Xushxabar: Diniy savollarga javob beruvchi Koll-markaz ish boshladi
Muhtaram yurtdoshlarimizning diniy savollariga javob berish maqsadida, O‘zbekiston musulmonlari idorasi tomonidan ibodatga doir shar'iy masalalarga telefon orqali javob berish tizimi yo‘lga qo‘yildi. Endilikda mo‘min-musulmonlarimiz bu boradagi o‘z savollariga ushbu koll-markaz orqali javob olishlari mumkin.
Koll-markazning ish tartibi dushanba kunidan shanba kunigacha, soat 9:00 dan 17:00 gacha davom etadi (ibodat vaqtlari istisno qilinadi, dam olish kuni yakshanba). Ushbu 78-150-33-44 telefon raqamlari orqali koll-markazga qo‘ng‘iroq qilinadi va fatvo bo‘yicha malakali mutaxassislardan javob olinadi.
Darhaqiqat, Islom ilm-ma'rifat dinidir. Inson o‘zi bilmagan narsasini so‘rab o‘rganishi kerak. Zero, Alloh taolo Qur'oni karimda: “Agar bilmaydigan bo‘lsangiz, zikr ahllaridan so‘rangiz!”, deb buyurgan (Nahl, 43).
Rasululloh sollallohu alayhi va sallam: “Bilimsizlikning davosi savoldir”, – deya bayon qilganlar (Imom Abu Dovud rivoyati).
Mashhur tobein Muhammad ibn Siyrin rahimahulloh esa shunday deganlar: "Shar'iy ilm din demakdir. Diningizni kimdan olayotganingizga e'tibor qarating!".
Alloh taolo ushbu loyihani barchamizga muborak aylasin.
O‘zbekiston musulmonlari idorasi Matbuot xizmati
Hech kim mehr va e'tibordan chetda qolmaydi
O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedov Samarqand viloyatiga safarlari mobaynida hududdagi yordamga, mehr va muruvvatga muhtoj, jismoniy imkoniyati cheklangan kishilar bilan ham uchrashib, ular bilan dildan suhbat qurdilar.
Samarqandda Muftiy hazratlari va Din ishlar bo‘yicha qo‘mita raisi avf etilgan fuqarolar bilan uchrashdi
O‘zbekiston Respublikasi Konstitusiyasi qabul qilinganligining 27 yilligi munosabati bilan bilib-bilmay jinoyat sodir etgan, hozirgi vaqtda qilmishiga chin ko‘ngildan pushaymon bo‘lgan va tuzalish yo‘liga qat'iy o‘tgan jazo muddatini o‘tayotgan 92 nafar fuqaro afv etilgan edi. Avf etilganlarning 14 nafari Samarqand viloyatidan. Muftiy hazratlari hamda Din ishlari bo‘yicha qo‘mita raisi Samarqand viloyatiga tashrifi doirasida Kattaqo‘rg‘on, Narpay, Ishtixon tumanlaridan avf etilgan 4 nafar fuqarolar bilan uchrashib, suhbatlashdilar. Suhbat davomida Prezidentimiz tomonidan qabul qilingan ushbu qarorning ahamiyati, tinchlik-xotirjamlikning qadriga yetish, shukr qilib, ota-onalarining duosini olgan holda, jamiyat va dinimizga xizmat qilishga chaqirdilar. Shundan so‘ng muftiy hazratlarining qalamlariga mansub diniy-ma'rifiy adabiyotlar hamda “Vaqf” xayriya jamg‘armasi tomonidan oziq-ovat mahsulotlari ularga sovg‘a qilindi. Ularning oilalaridagi hozirgi kabi xursandchiliklar doimiy bo‘lishi, tinchlik-osoyishtalik ne'mati, ona yurt qadriga yetib, shukronalik bilan hayot kechirish, farzandlarning halovatini ko‘rishlarini tilab duoi xayrlar qilindi.
Samarqand tashrifi davom etmoqda.
Muftiy hazratlari va Din ishlar bo‘yicha qo‘mita raisi Iroqdan qaytarilgan bolalar holidan xabar oldi
O‘zbekiston musulmonlari idorasi raisi, muftiy Usmonxon Alimov hazratlari yurtimizning bir qator hududlarida bo‘lib, sohaga tegishli vaziflarning ijrosi, diniy-ma'rifiy sohada olib borilayotgan ishlar ko‘lami bilan tanishib, imom-xatiblar bilan suhbatlashmoqda. Shuningdek, safarlar davomida aholi vakillari bilan uchrashuvlar, turli xayriya va saxovat tadbirlari ham tashkil etilmoqda.
Umrachilar Samarqandga yetib keldi
Umra ziyoratini ado etgan Samarqandlik 229 nafar ziyoratchilar bugun, 11 dekabr kuni Samarqandga yetib keldilar. Ularni Samarqand viloyat vakilligi binosida yaqinlari ishtirokida kutib olindi. Ziyoratchilarning barchasi sog‘-salomat, kayfiyatlari ko‘tarinki ruhda. Shu kunlarga yetkazgani uchun Alloh taologa shukronalar keltirmoqda.
Alloh subhanahu va ta'ala ibodat va ziyoratgohlaringizni ijobat aylasin!
Avf etilganlarning muammolari tinglandi
Konstitusiya qabul qilinganligining 27 yilligi munosabati bilan bilib-bilmay jinoyat sodir etib, jazo muddatini o‘tayotgan, hozirgi vaqtda qilmishiga chin ko‘ngildan pushaymon bo‘lgan va tuzalish yo‘liga qat'iy o‘tgan 92 nafar fuqaro afv etilgan edi. Avf etilganlar orasida 14 nafari Samarqand viloyatidan. Samarqand viloyat hokimi Erkinjon Turdimov 14 nafar avf etilgan shaxslar va ularning yaqinlari bilan uchrashdi. Ushbu tadbirda O‘MI Samarqand viloyat vakili Zayniddin Eshonqulov ham ishtirok etdi.
Diniy ma'rifatni yetkazish - bugungi kun imomining mas'uliyati hisoblanadi
Bugun dunyoning turli chekkalarida muqaddas islom nomidan sodir etilayotgan terrorchilik harakatlari, islomiy tushuncha va g‘oyalarni buzib talqin qilgan holda soddadil musulmonlarni chalg‘itish holatlari dinimizning bag‘rikenglik, mo‘tadillik va insoniylikka yo‘g‘rilgan musaffo ta'limotini aholi, xususan, yoshlarimizga to‘g‘ri tushuntirish zaruratini tobora oshirmoqda.
Shunday ekan, bugungi kun imomlari zimmasidagi mas'uliyatni chuqur his qilgan holda diniy ma'rifatni ommaga yetkazishlari, ijtimoiy hayotda faol ishtirok etishlari, Vatan ravnaqi, Yurt tinchligini ta'minlash va xalq farovonligini oshirishga munosib hissa qo‘shishlari zarur. Mana shularni o‘zida his etgan imom-xatiblarimizdan Samarqand shahar “Xo‘ja abdu Darun” jome masjidi imom-xatibi Zafar Mahmudov ham ta'lim muassasalari, mahalla yig‘inlarida bo‘lib, sof islom ma'rifati, ota-bobolarimizning mustahkam va sobit e'tiqod yo‘llaridan og‘ishmay borish, bugungi kunda jahonda yuz berayotgan turli ziddiyat va to‘qnashuvlar mohiyati, hushyor va ogoh bo‘lib yashash, ommaviy madaniyat niqobi ostidagi ma'naviyatimiz, e'tiqodimizga tamomila zid odatlar haqida so‘z yuritib, ayanchli yakunlari haqida hayotiy misollar keltirib o‘tmoqda.
Viloyat hokimining sayyor qabuli o‘tkazilmoqda
Ayni paytda Samarqand pedagogika va xizmat ko‘rsatish kollejida viloyat hokimi Erkinjon Turdimov Samarqand shahri aholisi uchun sayyor qabul o‘tkazmoqda. Viloyatdagi barcha tashkilotlari rahbarlari qatorida viloyat bosh imom xatibi Z. Eshonqulov va Samarqand shahar bosh imom xatibi N. Islomov ham mazkur qabulda ishtirok etib, fuqarolar murojaatini ijobiy hal etishda faol harakat qilishmoqda.
O‘MI Samarqand viloyat vakilligi
Samarqandlik navbatdagi ziyoratchilar guruhi Umra safariga kuzatib qo‘yildi
Xabaringiz bor Umra ziyoratiga vatandoshlarimizning borishida cheklovlar bekor qilinib, endilikda umra safariga cheklanmagan miqdorda ziyoratchilar borishi mumkin bo‘lgan edi. Shunga binoan har o‘n kunda viloyatmizdan ziyoratchilar Umra safariga yo‘l olmoqdalar. Bugun, 10 dekab kuni Samarqand viloyatidan navbatdagi 4 ta guruhda 196 nafar ziyoratchilar Umra safariga yo‘lga chiqdi. Ushbu guruhlarga tajribali, ilmli imom-xatiblardan iborat guruh rahbarlari boshchilik qilmoqda. Viloyatmizning barcha tumanlaridan ziyoratchilar kunning avvalida viloyat vakilligi binosiga yig‘ildiilar. Shundan so‘ng safaroldi xayrlashuvi va duolar qilinib, muborak safarga kuzatib qo‘yildi.
Umra ziyoratida ulkan ajru savoblar bor. Baytullohning atrofida tavof qilib aylanar ekan ularning har bir qadamiga bir hasana yozilib, bittadan gunohlari o‘chirib boriladi. Abdulloh ibn Umar roziyallohu anhu Payg‘ambarimiz alayhissalomdan rivoyat qilgan, ul zot aytganlar:
“Kimki Baytullohni tavof qilar ekan bir oyog‘ini yerdan ko‘tarib, ikkinchisini yerga qo‘ygunicha Alloh unga bir hasana yozadi, bitta gunohini o‘chiradi va darajasini bir pog‘onaga oshiraveradi” (Imom Ahmad).
Allohim, barcha yaxshi niyat bilan safarga otlangan va umra ibodatlarini ado etib qaytayotgan yurtdoshlarimizning ibodatlarini qabul qilsin!
“Mehr” inosonparvarlik operatsiyasi orqali Vatanga qaytarilgan shaxslarga mehr ko‘rsatilmoqda
O‘zbekiston Respublikasi Prezidenti Shavkat Mirziyoevning topshirig‘iga binoan, bir qancha vatandoshlarimiz, asosan ayollar va bolalar Yaqin Sharqdagi qurolli mojarolar hududidan yurtimizga qaytarilgan edi. Aldov oqibatida o‘zga yurtga borib qolib, og‘ir hayotiy davrni boshidan o‘tkazgan bu insonlarga hukumatimiz tomonidan tibbiy, psixologik, moddiy va ma'naviy yordam ko‘rsatilib, ularning tinch hayotga qaytishi, jamiyatga moslashishlari, ta'lim va ijtimoiy dasturlarda ishtirok etishlari uchun zarur sharoit yaratildi, boshpana va ish bilan ta'minlash choralari ko‘rildi.
Xorijdan qaytib kelganlar bugun nima bilan band?
Imom-xatiblar, mahalla faollari va boshqa mutasaddi tashkilotlar tomonidan barcha mahallalarda xorijga ishlash va o‘qishga ketib, O‘zbekistonga qaytib kelgan yoshlar bilan suhbatlar o‘tkazilmoqda. Suhbat jarayonida ularning xorijdagi safari, hozirgi turmush sharoiti, mavjud muammolari o‘rganilib, mutasaddi idoralar vakillari bilan hamkorlikda ularni bartaraf etish choralari ko‘rilmoqda. Yoshlarning bo‘sh vaqtlarini mazmunli o‘tishini ta'minlash, tadbirkorlik bilan shug‘ullanishlari uchun sharoit yaratish, bilimlarini oshirish, bandligini ta'minlash bo‘yicha ham zaruriy ishlar amalga oshirilmoqda.
Ishtixon tuman bosh imom-xatibi A.Yaqubov va tumandagi barcha imom-xatiblar uzoq muddat xorijda bo‘lib qaytgan fuqarolar bilan uchrashib, ularning safar ta'surotlari, hozirgi yashash tarzi, tug‘ilib o‘sgan vatani, dinimiz, milliyligimizga sadoqatli bo‘lish borasida tushunchalar berib kelmoqda.
O‘MI Samarqand viloyat vakilligi
Otinoyilarning navbatdagi malaka oshirish o‘quvlari viloyat vakilligi binosida boshlandi
Oldin xabar berganimizdek O‘zbekiston xalqaro islom akademiyasi huzuridagi Malaka oshirish markazining Samarqand viloyati mintaqaviy filiali tomonidan otinoylar uchun tashkil etilgan o‘quv kursi Samarqand kompyuter texnologiyalari va gidromelioratsiya kolleji binosida olib borilayotgan edi. O‘quv mashg‘ulotlari 2019 yil 16 sentyabrdan boshlangan bo‘lib, har bir guruh 2 hafta mobaynida 72 soatlik mashg‘ulotlarda ishtirok etib kelmoqda.
Prezident 92 nafar mahbusni afv etdi. Ular orasida dindorlar ham bor
O‘zbekiston Respublikasi Prezidenti Sh.Mirziyoev qilmishidan chin yurakdan pushaymon bo‘lgan va tuzalish yo‘liga qat'iy o‘tgan ozodlikdan mahrum qilish jazosini o‘tayogan insonlar guruhini afv etish haqidagi farmonni imzoladi. Bu haqda Kun.uz xabar tarqatdi.
Toshkent shahridan kelgan imom-xatiblar Samarqand viloyatidagi masjidlarda Juma namozlarini ado etib berdilar
Yurtimizda barcha jabhalarda islohotlar olib borilayotganiga guvoh bo‘lib turibmiz. Jumladan, diniy sohada ham ko‘plab ijobiy o‘zgarishlar bo‘layotgani barchamizni xursand qilmoqda. Ushbu kunlarimizga shukronalik keltirish, tinchlik va xotirjamlikning qadriga yetish, olib borilayotgan islohotlarning asl mohiyatini tushinib yetish borasida suhbat qilish uchun Mamlakatimizning taniqli ulamolari, tajribali imom-xatiblar chekka hududlardagi masjidlarda juma namozlarini o‘qib, ma'ruza bilan ishtirok etishlari an'ana bilan davom etib kelmoqda.
Muftiy hazratlari Urganchdagi madrasaning yangi binosi loyihasi bilan tanishdilar
O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedov Xorazm viloyatiga safarlari davomida Urganch shahridagi “Imom Faxriddin ar-Roziy” o‘rta maxsus islom bilim yurti faoliyati bilan tanishib, ustoz va talabalar bilan muloqot qildilar.
Muftiy hazratlari boshchiliklaridagi avval ushbu madrasa uchun ajratilgan yangi binoning ta'mirlash loyihasi bilan yaqindan tanishdilar va o‘zlarining muhim tavsiyalarini berdilar.
Tashrif doirasida barcha mudarris va talabalar bilan muftiy hazratlari suhbat o‘tkazib, Haq taoloning bergan ne'matlariga shukr qilish, yurtimizdagi tinchlik va osoyishtalikning qadriga yetish, diniy va dunyoviy ilmlarni mustahkam egallash, kelgusida xalqimiz va dinimiz rivojiga munosib hissa qo‘shish zarurligini ta'kidladilar.
Ayniqsa bugungi kunda din nomidan jinoyat qilayotgan toifalarga qarshi kurashish uchun zarur ilmlarni puxta o‘rganish va ularning noto‘g‘ri da'volarida raddiya berish qobiliyatiga ega bo‘lish eng dolzarb vazifalardan ekanini alohida qayd etdilar.
Uchrashuvda “Vaqf” xayriya jamoat fondi tomonidan ustoz va talabalarga Qur'oni karim kitoblari tuhfa etildi.
