Янги масжидлар кўпаймоқда
Мамлакатимизда олиб борилаётган ислоҳотлар диний соҳани ҳам четлаб ўтаётгани йўқ. Булар ҳақида кўплаб мисоллар келтириш мумкин. Ана шундай янгиликлардан бири бу “Домла Камолиддин” жоме масжидида олиб борилаётган қурилиш ишларидир. Масжид 1996 йил қурилиб, фойдаланишга топширилган. У икки юз кишига мўлжалланган эди. Ҳозир жамоат ва ҳомийлар кўмаги билан қўшимча янги масжид биноси қурилмоқда. Бино фойдаланишга топширилгандан сўнг минг киши ўз ибодатларини шинам масжидда адо этиш имконига эга бўлади.
Ишларнинг бориш жараёни, намозхонлар билан суҳбатлашиш мақсадида Самарқанд вилоят бош имом-хатиби бугун “Домла Камолиддин” жоме масжидида бўлди.
“Домла Камолиддин Охун” масжидида ўзгаришлар кутилмоқда
Вилоят вакиллиги ўз олдига марказдан узоқ, чекка ҳудудларда жойлашган мажидлар билан танишиш, намозхонлар билан учрашиш каби вазифаларни қўйган. Шунга асосан вилоят бош имом-хатиби З.Эшонқулов Қўшработ туманидаги “Домла Камолиддин Охун” жоме масжидида бўлди.
Муборак масканлар зиёрати
Самарқанд вилоятидан 244 нафар Умра зиёратини адо этаётган юртдошларимиз бугун Маккаи мукаррама шаҳридаги Арафот, Мино, Муздалифа, Жамарот водийлари ҳамда Савр, Нур тоғларини, Ҳиро ғорини зиёрат қилишмоқда. Маккаи мукаррама ва Мадинаи мунаввара тупроқларининг ҳар қаричига Расулуллоҳ соллаллоҳу алайҳи васаллам ва саҳобаи киромларнинг қадамлари теккан. Бу шаҳарларнинг кўп ўринларида илоҳий ваҳий нозил бўлган. Шу сабабли, зиёратчилар бу жойларни зиёрат қилиб, иложи борича кўпроқ дуо ва зикрлар қилишга ҳаркат қилмоқда.
Аллоҳ таоло зиёратчилармизнинг ажру мукофотларини зиёда қилсин!
Майк Помпео Тошкент шаҳар бош имом-хатиби билан учрашди
АҚШ давлат котиби Майк Помпео 2 февраль куни Тошкент шаҳри бош имом-хатиби Нуриддин Холиқназаров ва бошқа диний фаоллар билан учрашди. Бу ҳақда Помпео Twitter’даги саҳифасида маълум қилди.
«Ўзбекистонда диний раҳбарлар билан ислоҳотлар ва қонунчиликдаги ўзгаришлар диний эркинликка қандай ҳисса қўшиши мумкинлиги ҳақида суҳбатлашдик. Ҳукумат томонидан ушбу соҳада эришилган ютуқлар менда катта таассурот қолдирди ва Ўзбекистоннинг кейинги муваффақиятларини сабрсизлик билан кутаман», — деб ёзди Помпео.
АҚШ Давлат департаменти делегацияси Президент Шавкат Мирзиёев томонидан қабул қилиниши кутилмоқда.
Ўзбекистон Ташқи ишлар вазирлигида икки томонлама музокаралар ўтказиш кўзда тутилган.
Шунингдек, АҚШ Давлат котиби Тошкент шаҳрида ўтказиладиган «Марказий Осиё—АҚШ» («C5+1») шаклидаги вазирлар учрашувида иштирок этади.
Манба: hidoyat.uz
Вилоят бош имом-хатиби масжидлар фаолияти билан танишди
Масжидлар фаолияти, куз-қишги мавсумдаги ҳолати, намозхонлар учун яратилган шароитлар билан танишиш мақсадида Самарқанд вилоят бош имом-хатиби З.Эшонқулов Самарқанд шаҳрида жойлашган “Намозгоҳ” ва “Хўжа Нисбатдор” масжидларида бўлди. Масжидларнинг ҳолати, тозалик, ободонлаштириш ишлари, хонақоҳнинг иссиқлиги, таҳоратхоналардаги шароитлар билан танишган вилоят бош имом-хатиби масжидлар фаолиятини янада такомиллаштириш, намозхон ва зиёратчилар учун янада қулайликлар яратиш юзасидан бир қанча таклиф ва тавсияларини берди.
Имом Мотуридий фаолиятига бағишланган халқаро анжуманга тайёргарлик ишлари бошланди
Жорий йилнинг 3-5 март кунлари Самарқандда “Имом Абу Мансур Мотуридий ва Мотуридия таълимоти: ўтмиш ва бугун” мавзуидаги халқаро анжуман ўтказилади.
Вилоят бош имом-хатиби Пахтачи туманида бўлди
Пахтачи тумани билан Самарқанд вилояти марказининг орасидаги масофа 130 км ташкил этади. Бугунги кунда туманда 12 та жоме масжид фаолият юритмоқда. Вилоят бош имом-хатиби З.Эшонқулов марказдан узоқда жойлашган масжиларда олиб борилаётган ишлар билан танишиш, намозхонлар билан суҳбатлашиш мақсадида бугун, Пахтачи туман “Тошкўприк” масжидида жума намозини ўқиди. Бош имом-хатиб жамоатга “Илмли ёшлар юрт келажаги” мавзусида маъруза қилар экан, ёшларимиз тарбияси ва келажагига ота-онанинг масъул эканлиги, юрт тинчлиги ва ободлигига ҳисса қўшадиган фарзандлар бўлиб вояга етишишларида ота-оналарнинг ўрни, бугунги кунларга шукроналик келтириш, мамлкатамизда амалга оширилаётган ислоҳотлар ҳам тўхталиб ўтди.
Самарқанд шаҳрида янги масжид қад ростламоқда
Намозхонларга янада қулай шароитлар яратиш, уларни жума ва ийд намозлари чоғида ёғингарчилик ва қуёшнинг иссиқ тафтидан ҳимоялаш мақсадида Самарқанд шаҳридаги “Хўжа абду Дарун” жоме масжидида янги масжид биноси қурилмоқда. Ҳашар, хайрия йўли билан бино бўлаётган масжид замонавий ва миллий меъморчилигимиз анъаналари уйғунлашган ҳолда қад ростлайди. Ҳозир масжиднинг асос қисмида ишлар олиб борилмоқда. Шунингдек, бу жойда бир вақтнинг ўзида юз кишига хизмат кўрсатадиган таҳоратхона, хизмат хоналари ҳамда кутубхона биносининг қурилиши якунланган. Ушбу бинода пардозлаш, жиҳозларни ўрантиш ишлари олиб борилаяпди. Яқин ойлар ичида таҳоратхона фойдаланишга топширилади. Кейинчалик таҳоратхонадаги ўринлар сонини янада кўпайтириш учун имконият мавжуд. Мамлакатмизда зиёрат туризмига катта эътибор қаратилаётганлиги муносабати билан “Хўжа абду Дарун” зиёратгоҳига ҳам кўплаб хорижлик меҳмонларнинг ташрифи кузатилмоқда. Шу боис бинодан аёллар учун ҳам алоҳида таҳоратхона ўрин олган.
Самарқандликлар Ислом Каримовни ёд этмоқда
Ўзбекистон Республикасининг Биринчи Президенти Ислом Каримов таваллуд куни муносабати билан юртимизда маънавий-маърифий тадбирлар, хотира кечалари ўтказилмоқда.
Ислом Каримов туғилиб ўсган ва айни пайтда мангу ором топган Самарқанд шаҳрида ҳам халқимизнинг буюк фарзанди ёд этилмоқда.
Бугун эрта тонгда Самарқанд вилояти ҳокими Э.Турдимов, вилоят бош имом-хатиби З.Эшонқулов ва жамоатчилик вакиллари иштирокида шаҳардаги Ислом Каримов мақбара-мажмуасини зиёрат қилди. Қуръон тиловат қилинди.
Манба: Zarnews.uz
239 нафар самарқандлик “Умра” зиёратига йўл олди
Бугун 239 нафар самарқандлик муборак “Умра” зиёратини адо этиш учун Самарқанд шаҳридан Тошкент шаҳрига жўнаб кетди.
Имом-хатиблар Мурожаатноманинг мазмуни билан яқиндан танишиб, ўз муносабатларини билдирди
Самарқанд вилоятида фаолият олиб бораётган барча имом-хатиб ва имом ноиблари Самарқанд шаҳридаги “Ёшлар иттифоқи” катта мажлислар залида Ўзбекистон Республикаси Президенти Шавкат Мирзиёевнинг Олий Мажлис Сенати ва Қонунчилик палатасига қилган Мурожаатномасини мазмун-моҳияти билан янада яқинроқ танишиш учун йиғилган эди. Йиғилганлар дастлаб, мурожаатноманинг видео ёзувини қайтадан томоша қилиб, тингладилар. Шундан сўнг Самарқанд давлат университети профессори Фарҳод Набиев сўзга чиқиб, Мурожаатноманинг ҳар бир банди бўйича тушунча берди. Хусусан, Муҳтарам Президентимизнинг мазкур йиғилишда диний бағрикенглик, жамиятда миллатлараро тотувлик ишлари, бу борада 30 июль – “Халқаро дўстлик куни” муносабати билан юртимизда биринчи марта “Дўстлик ҳафталиги”ни ва “Дўстлик” халқаро форум-фестивалини ўтказиш ҳақидаги таклифлари, Мамлакатимизда “жаҳолатга қарши – маърифат” деган эзгу ғоя асосида ислом динининг инсонпарварлик моҳиятини, тинчлик ва дўстлик каби олижаноб мақсадларга хизмат қилишини тарғиб этиш, жорий йилда ҳадис илмининг султони Имом Бухорий, калом илми асосчиси Абу Мансур Мотуридий ва унинг давомчиси Абу Муин Насафийнинг ҳаёти, илмий меросига бағишланган ҳамда диний бағрикенглик мавзуларида халқаро илмий-амалий конференциялар ва бошқа тадбирлар ташкил этилиши бўйича билдирган фикрлари, Имом Бухорий бобомизнинг Самарқанддаги ёдгорлик мажмуасини мутлақо янги лойиҳа асосида қайта барпо этиш ишларини, шунингдек, буюк аллома Баҳовуддин Нақшбанд бобомизнинг 700 йиллик таваллуд айёмини юқори савияда ўтказиш ҳақидаги режалари, кейинги йилларда юртимизда олиб борилаётган инсонпарвар сиёсат туфайли тўғри йўлдан адашган, билиб-билмай хатога қўл урган фуқароларни соғлом ҳаётга қайтариш бўйича муҳим ишлар амалга оширилгани, жорий йилда ҳам диний экстремистик йўлга кириб қолганидан чин дилдан пушаймон бўлган шахсларнинг ижтимоий-маиший муаммоларини аниқлаш ва ҳал этиш, уларни жамиятга мослаштириш бўйича ишлар давом эттирилиши бўйича фикрлари атрофлича таҳлил қилинди.
Бош имом-хатибларнинг Малака ошириш ўқувлари якунланди
Ўзбекистон халқаро ислом академияси ҳузуридаги Малака ошириш марказида Республикамиздаги барча вилоят, шаҳар ва туман бош имом-хатибларининг икки ҳафталик малака ошириш ўқувлари бугун ниҳоясига етди. Ўқув якунида тингловчилардан якуний тест синовлари олиниб, унда яхши натижа кўрсатган имом-хатибларга сертификатлар топширилди.
Тест синовлари 100 баллик тизимда бўлиб ўтди. Унда энг юқори балл олганлар марказ раҳбарияти томонидан фахрий ёрлиқ ва эсдалик совғалари билан тақдирланди. Ушбу тақдирланганлар орасида Самарқанд вилоят бош имом-хатиби Зайниддин домла Эшонқулов ҳам бор. У киши якуний тест синовларида энг юқори – 100 баллни қўлга киритдилар.
Самарқанд вилоят вакиллиги ходимлари ҳамда вилоятдаги барча диний соҳа вакиллари номидан домлани муборакбод этамиз. Муқаддас динимиз, мусулмонлар хизмати ҳамда Ватанимиз равнақи йўлида бундан буён ҳам ўз билим ва малакаси билан ҳормай-толмай химзат қилишида Аллоҳ таолодан куч-қувват ато этишини сўраймиз.
Вилоят имом-хатиблари томонидан Президент мурожаатномаси катта қизиқиш билан қабул қилинди
Хабарангиз бор кеча, 24 январь куни Ўзбекистон Республикаси Президенти Шавкат Мирзиёев Олий Мажлиснинг Сенати ва Қонунчилик палатасига навбатдаги Мурожаатномани тақдим этди. Пойтахтимиздаги Халқаро конгресс марказида бўлиб ўтган йиғилишда Олий Мажлис Сенати аъзолари ва Қонунчилик палатаси депутатлари, шунингдек, ижро ҳокимияти ва хўжалик бошқаруви органлари раҳбарлари, нодавлат ташкилотлар, ОАВ вакиллари ва кенг жамоатчилик иштирок этди.
Жамоатчилик томонидан катта қизиқиш билан қабул қилинган ушбу мурожаатнома барча соҳа вакиллари орасида қизғин муҳокама қилиниб, мурожаатномада кўрсатилган таклиф ва мулоҳаза ҳамда камчиликлар юзасидан ўзларининг олдиларига қўйилган вазифаларни белгилаб олмоқда.
Бугун Самарқанд вилоятида фаолият олиб бораётган барча имом-хатиб ва имом ноиблари Самарқанд шаҳридаги “Ёшлар иттифоқи” катта мажлислар залида Ўзбекистон Республикаси Президенти Шавкат Мирзиёевнинг Олий Мажлис Сенати ва Қонунчилик палатасига қилган Мурожаатномасини катта экран орқали қайтадан томоша қилиб, уни таҳлил этиш учун йиғилдилар. Ҳозир айни дамда мурожаатномани йиғилганлар томоша қилмоқда.
2020 йил Илм-маърифат ва рақамли иқтисодиётни ривожлантириш йили деб эълон қилинди
Президент Шавкат Мирзиёев Олий Мажлиснинг Сенати ва Қонунчилик палатасига навбатдаги Мурожаатномасида илм-маърифат ва технологиялар ривожига алоҳида аҳамият қаратди.
