Uyga shag‘am xarid qilish maqsadida do‘konlarni aylanib, xo‘jalik mollari bilan savdo qiladigan yangi do‘konga kirdim. Do‘konni aylanib, tomosha  qila boshladim. Sotuvchi ayol menga murojaat qilib, bobo, siz  Qur'on o‘qiysizmi? dedi. Men  darhol tushundim, u tilovat va duo qilib   qo‘ying, demoqchi. Alloh qodir qilgunicha o‘qiyman, dedim hamda chetroqda turgan kursiga o‘tirib, Qur'on karim oyatlaridan tilovat qilib so‘ng ortidan duo qildim.

Do‘konda xaridor yo‘q edi. Sotuvchi juvon o‘zining axvolini aytib   berdi. Toshkentda yashovchi bir kishiga ikkinchi xotin bo‘lib erga tekkan ekan. Ular birgalikda olti yil yashabdilar va kundoshi mojaro  qilib uni haydabdi. Hozirda u bitta qizchasi bilan onasinikida yasharkan. O‘sha hovlida ayolning ukasi ham oilasi bilan istiqomat qilishini aytdi. Yashash tarzimiz o‘rtacha ahvolda, qizim bilan qiynalayapman. Ta'minotni qilolmayapman, deb beg‘araz, soddadillik bilan bu gaplarni aytib berardi. Ba'zi dugonalarim menga jirkanch ishlarni taklif qilib, oson  pul  topish    yo‘llarini o‘rgatayapti, lekin men Alloxdan qo‘rqaman, deya ularni  rad qildim, dedi.

Men udan biror-bir turmushidan ajragan erkakga tegasizmi, qizim?   Degandim, noilojlikdan rozi bo‘lardim, dedi. Qishlog‘imizda beva erkaklar ko‘p. Hammasi tinch, o‘ziga to‘q, bolalaridan tingan. Ba'zilari hovlida yolg‘iz qolishgan. Bir boshidan o‘sha kishilarga sharoitni tushuntirdim. Hammasi eh attang, bolasi  bor ekanda, bo‘lmasa uylanardim, o‘zi xotin axtarib yuribman,  deb javob berishdi.

Men bu voqea bilan nima demoqchiman. Avvallarri ota-bobolarimiz   birinchi turmushlari o‘tgannidan so‘ng qayta uylanmoqchi bo‘lsalar, bolali bevalarga og‘iz solar edilar, savob bo‘ladi, deb. Hattoki, ro‘zg‘orlari to‘kis ham emasdi. Qaramog‘larida o‘zining bir nechta bolalari bo‘lar edi. Hozirga kelib uylanmoqchi bo‘lgan qo‘shtirnoq ichidagi beva erkaklar ayolni surishtiradi, axtaradiki, birinchi turmushidan  bolasi  bo‘lmasin,  tug‘magan   bo‘lsin, meros talab qilmasin, uy olib ber, demasin. Shuning uchun ham  ataydan bir  o‘zlari yashab o‘tayaptilar.

Allohga shukrlar bo‘lsinkim,  davlatimiz  odamlarga sharoitini yaxshi   qilib qo‘yibdi. Beva qolgan ayollar ham ayniqsa bolalari bo‘lsa xam  ularga keng yengilliklar yaratib qo‘yibdi. Aksariyat beva ayollarga sovchi bo‘lib   borsang, yo‘q deyishadi, nima  qilaman  o‘zimga xo‘jayin paydo qilib deydi. Hozir o‘zimga o‘zim xon, ko‘lankam maydon, deyishadiganlari ham ko‘p. Ularning bu tushunchalari albatta nomaqul. Lekin bir jihatdan   erkaklarimiz qanday  bo‘lsa,  ayollarimiz  ham  shunday. Qani mard, yetimni boshini silaydigan, ularni bema'ni, yomon yo‘llarga kirishidan  asraydigan erkaklarimiz. Masjidimiz imom-xatiblari o‘z ma'ruzalarida beva ayol va uning farzandiga yaxshilik qilishning savobi haqida Payg‘ambarimizning bir hadislarini aytgan edilar. U zot sollallohu alayhi vasallam: «Tul xotin va miskinning tashvishi ila harkat qilgan kishi Allohning yo‘lida jihod qiluvchi mujohidlar, kechalari namoda qoim, kunduzlari ro‘zada soim bo‘luvchi kabidir», degan ekanlar. Alloh talo barchaga ofiyat, oilaviy xotirjamlik ato qilsin.

Axmedov Islom bobo Kattaqo‘rg‘on tumani “QALNDARXONA” jome masjidi xodimi