Istiqlol sharofati bilan yurtimizda diniy va milliy qadriyatlarimiz qayta tiklandi. Diyorimiz musulmonlarining asriy orzu-umidlari ro‘yobga chiqa boshladi. Natijada, manaviyatimiz tobora yuksalib boryapti. Mamlakatimiz moddiy va ma'naviy jihatdan kun sayin taraqqiy etayotir. Lekin, afsus, bu ne'matlardan foydalanib, shukr o‘rniga noshukrlik qiladigan, g‘animlarimiz nog‘arasiga o‘ynaydigan, o‘z yurtiga tosh otadigan nabakorlar ham yo‘q emas. Ayniqsa, chet ellarda bo‘lgani kabi, bizning mamlakatimizda ham turli ekstremistik, buzg‘unchi aqidaparast va mutaassib oqimlarning botil aqidalariga ergashib zalolatga ketgan gumrohlar ham borligi kishini ranjitadi. Erta bahorda yerdan bodrab chiqadigan qo‘ziqorindek paydo bo‘lib, so‘ng sarobdek so‘nib yo‘k bo‘lib ketayotgan yangi-yangi oqimlarga bir nazar tashlasangiz, ularning ildizlari, asoslari va g‘oyalari uzoq tarixdagi xorijiylar, murjiiylar, shia va mo‘tazila kabi buzg‘unchi toifalar bilan hamohang ekanini tushunasiz.

Yurtimizda diniy bilimi o‘ta sayoz, turli fitna-fasod qo‘zg‘aydigan fikrlar va g‘oyalarni sodda xalq ongiga singdirishga urinadigan chalasavod kimsalarga ergashib ketmasliklari uchun yoshlarni to‘g‘ri yo‘lga solish va hushyorlikka chorlash, ayniqsa, biz imom-xatiblarning asosiy burchimizdir. Shahidlik masalasida. Ushbu so‘z “hozir, guvoh, ko‘rgan-bilganlari haqida xabar beruvchi” ma'nolarni ifodalaydi. Shuningdek, «Shahid» Alloh taoloning sifatlaridan biri bo‘lib, «guvohligi ishonchli, har doim hozir bo‘luvchi Zot” degan ma'nolarni anglatadi. “Shahid” so‘zining yana bir ma'nosi o‘zga shaxs tomonidan nohaq o‘ldirilgan musulmondir. Kishining o‘zini o‘zi o‘ldirishi, garchi niyati din yo‘lida deb e'lon etilsa-da, “o‘z joniga suiqasd qilish» deb baholanadi. O‘zini o‘zi o‘ldirish- bu o‘z hayotini qasddan to‘xtatishdir. Shariat nuqtai nazaridan bu harakat qattiq qoralanadi, Parvardigor bergan hayotga tajovuz qilish darajasidagi gunohi kabira hisoblanadi. Alloh taolo ogohlantiradi:

وَمَن يَقْتُلْ مُؤْمِناً مُّتَعَمِّداً فَجَزَآؤُهُ جَهَنَّمُ خَالِداً فِيهَا وَغَضِبَ اللّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً

“Kim bir mo‘minni qasddan o‘ldirsa, uning jazosi jahannamdir. Unda abadiy qolur. Unga Allohning g‘azabi va la'nati yog‘ilur. Va Alloh unga ulkan azobni tayyorlagandir” (Niso surasi, 93-oyat).

Abu Hurayra roziyallohu anhudan rivoyat qilingan hadisda Payg‘ambarimiz sollallohu alayhi va sallam aytdilar: “Kim o‘zini tog‘dan tashlab o‘ldirsa u jahannam o‘tida abadiy doimiy yiqilib azoblanadi. Kim zahar ichib o‘ziga suiqast qilsa jahannam o‘tida qo‘lidagi zaharni ichgan holda abadiy azoblanadi Kim o‘zini temir bilan o‘ldirsa jahannam o‘tida temirni qorniga urgan holda abadiy azoblanadi” (Imom Buxoriy rivoyati).

Hozir ba'zi guruhlar “o‘zini o‘ldirish” tushunchasini shahidlik bilan qorishtirib talqin qilishyapti. Shaxsning ma'lum maqsadlar yo‘lida o‘zini o‘zi o‘ldirishi “shahidlik amaliyoti” deb Nomlanishi ayni adashishdir. Yovuz niyatli kuchlar o‘z harakatlarini oqlash maqsadida keltirgan barcha dalillarni Islom ulamolari qoralashgan va asossiz deb topishgan.

Rahimov Uchqun-Imom Faxriddin ar-Roziy o‘rta maxsus islom bilim yurti ma'naviy­ – ma'rifiy ishlar bo‘yicha mudir o‘rinbosari

Manba: Muslim.uz