2017 yil 17 oktyabr kuni mamlakatimizga amaliy tashrif bilan kelgan Checheniston Respublikasi rahbari Ramzan Qodirov Samarqandga tashrif buyurdi.

Tashrif marhum Birinchi Prezidentimiz Islom Karimov qabrini ziyorat qilish bilan boshlandi. Qabr oldida taomilga ko‘ra, Qur’oni karim tilovat qilindi.

Martabali mehmon marhum yurtboshimiz Islom Karimov dafn etilgan hududda barpo etilayotgan yodgorlik majmuasi bilan yaqindan tanishdi. Prezidentimiz Shavkat Mirziyoevning ko‘rsatmalari asosida takomillashtirilayotgan majmuada olib borilayotgan ishlar Checheniston rahbarida katta taassurot qoldirdi.

Ramzan Qodirov Imom Buxoriy majmuasiga tashrifi asnosida Imom Buxoriy hazratlarining qabrini ziyorat etar ekan, u kishiga bo‘lgan yuksak ehtiromini izhor etdi. Bobokalonimizning qabrlari poyida Qur’oni karim oyatlaridan o‘qilib, duo qilindi. Mehmon majmua tarixi bilan tanishib, dunyo ahli tan olgan buyuk imomga ko‘rsatilayotgan davlat darajasidagi e’tiborni yuksak baholadi.

Majmua yonidan bunyod etilayotgan Imom Buxoriy xalqaro ilmiy-tadqiqot markazi ajdodlarimizning boy ma’naviy merosi nafaqat yurtimizda, butun islom olamida keng o‘rganilishiga katta imkoniyat berishi e’tirof etildi.

Mehmonlar tashrif davomida “Xo‘ja Doniyor” ziyoratgohi, buyuk sahoba Qusam ibn Abbos roziyallohu anhu mangu qo‘nim topgan “Shohi Zinda” majmuasi va “Registon” ansamblini ham ziyorat qilishdi.

Manba: "muslim.uz"