Маълумки, жамиятимизнинг гуллаб-яшнаши, тараққий этиши ёшларимизнинг ақлий, илмий, жисмоний салоҳиятига, маънавиятига боғлиқдир. Айниқса, аҳолисининг катта қисмини ёшлар ҳиссасига тўғри келадиган бизнинг юртимизда бу масаланинг аҳамияти бениҳоят катта. Албатта, ҳар томонлама етук шахс, маънавиятли ёшлар ўз-ўзидан пайдо бўлиб қолмайди. Балки, уларнинг тарбияси, таълими билан шуғулланиш, уларни китоб ўқишга, илм олишга қизиқтиришимиз керак. Бунинг учун керакли шарт-шароитлар яратишимиз керак. Шу билан бир қаторда уларни эзгуликдан, ҳақ йўлдан чалғитувчи ёмон иллатлардан ҳам сақлашимиз лозимдир. Ана шундай иллатлардан бири муқаддас Ислом динини нотайин кишилардан ўрганишдир.

Дарҳақиқат, сўнгги йилларда ёшларимизни тўғри йўлдан чалғитишга сабаб бўлган омиллардан бири ижтимоий тармоқларда беркиниб олган кимсалардан илм олишларидир. Дин илми тўғри келган кимсалардан олинмайди. Динни насл-насаби маълум, устози, мазҳаби, эътиқоди тайин кишилардан олинади. Гапираётган гапи бошқа, мақсади бошқа одамлар жамият учун катта хавф туғдиради. Мусулмонларни турли фирқаларга бўлиб ташлайди. Мусулмонларни турли фитналарга солаётган кишилар маърузаларини телефонда сақлаш, тарқатиш жавобгарликка сабаб бўлиши ҳақида кўл телефонларимиз орқали огоҳлантирилдик. Ҳар бир фуқаро бундан тегишли хулоса чиқариб, жавобгарликка сабаб бўладиган ишни қилиб, ўз бошига ўзи ташвиш орттириб олмасликлари керак. Айрим кишилар келган хабарга қизиқиб, ҳар-хил видео, аудиоларини топиб кўришмоқда. Бу хатодир. Асло бунга йўл қўймаслик керак. Динни ишончли, эътиборли, кўпчилик эътироф қилган устозлардан ўрганиш тўғри йўлдир.

Хулоса ўрнида айтадиган бўлсак, бугунги кунда ёшларимизнинг камолоти йўлида барча шароитлар яратиб берилмоқда. Зеро, имон-эътиқоди мустаҳкам, илм-маърифатли, жисмонан соғлом ёшлар юртнинг буюк келажаги гаровидир.

Шарипова Гулнора – Самарқанд шаҳар Мурод Авлиё жомеъ масжиди имом хатибининг хотин-қизлар масалалари бўйича ёрдамчиси.