Bugun, O‘zbekiston musulmonlari idorasi Samarqand viloyati vakilligining tashabbusi hamda yillik ish rejasi doirasida, ma'naviyat, mehr-shafqat va xayr-saxovat ruhi baland, yodda qolarli sayyor yig‘ilish Payariq tumanida o‘tkazildi.

Tadbir avvalida viloyat bosh imom-xatibi Ahmadxon domla Alimov ishchi guruh a'zolari bilan yig‘ilib, sayyor uchrashuvlarni samarali va mazmunli o‘tkazish bo‘yicha muhim ko‘rsatma va topshiriqlar berdi. U kishi har bir masjid imom-xatibi va mas'ul shaxsga aholi bilan yuzma-yuz muloqot qilish, muammolarini eshitish va imkoniyatdan kelib chiqib joyida hal etish vazifasini alohida ta'kidladi.

Ezgu amallar – muhabbat va birdamlik ifodasi

Ahmadxon domla, Payariq tumani bosh imom-xatibi M.Abduxoliqov hamrohligida tuman markazidagi “Islom Nuri” jome masjidi hududidagi og‘ir ijtimoiy ahvoldagi, bemor va nogironligi bor oilalar xonadonlariga bordi. Ushbu tashriflarda:

• Bolajonlarga quvonch ulashish maqsadida maktab formalari va o‘quv qurollari topshirildi.
• Vaqf xayriya jamoat fondi Samarqand viloyati filiali tomonidan 50 ta oilaga oziq-ovqat mahsulotlari tarqatildi.
• Shuningdek, Payariq tumanida imom-xatiblarimiz hojilar bilan birga 325 ta honodonga kirib, ahli xonadonlarga duo va quvonch ulashdi. Xayrli uchrashuvlarda qardoshlik, birlik va saxovat fazilatlari yanada yuksak namoyon bo‘ldi.

Har bir yordam oluvchi xonadonda samimiy muloqot o‘rnatilib, ular haqiga ezgu duolar qilindi. Ota-onalarning minnatdorlik yoshlari, bolajonlarning shodlik qichqiriqlari barcha qatnashchilar qalbiga iliqlik bag‘ishladi.

Tadbirda viloyat hokimi o‘rinbosari V.Karimov, mutasaddi tashkilotlar va faol jamoat vakillari ishtirok etishi xayr ishlariga yanada ruhiy quvvat baxsh etdi.

Yangi xonadon – yangi hayot

Payariq tumanida homiylar, mahalliy hojilar va faollar birlashib, og‘ir ahvoldagi bir oila uchun yangi zamonaviy xonadon qurib bitkazdi. Ushbu xonadon rasmiy ravishda topshirilganda, oila a'zolarining ko‘zlaridagi quvonch yoshlari va duolar tadbirning eng yurakka yaqin lahzasi bo‘ldi. Bu misol xalqimizdagi hamjihatlik va saxovat tuyg‘usining yorqin namoyoni bo‘ldi.

Ta'limga qo‘llab-quvvatlash

Yangi o‘quv yili oldidan hojilar, mahalla faollari va imom-xatiblar tashabbusi bilan maktab hojatxonalari ta'mirlanmoqda. Bu ishlar nafaqat gigiyena va sog‘liq uchun, balki o‘quvchilarning o‘z maktablariga mehrini oshirish uchun ham katta ahamiyat kasb etmoqda.

Dolzarb mavzularda ma'rifiy suhbatlar

Viloyat ishchi guruhi Payariq tumanidagi 12 ta masjidda Peshin namozini ado etib, jamoatga quyidagi mavzularda ta'sirli ma'ruzalar qildi:

• “Qo‘shnichilik odoblari va haqlari”
• “Oila – muqaddas dargoh”
• “Ommaviy axborot vositalaridan foydalanish odoblari”
• “Tinchlik qadri”
• “Farzandlar tarbiyasiga e'tiborsiz bo‘lmaylik”
• “Yoshlar – kelajagimiz”
• “Ne'matlarga shukr qilish fazilati”
• “Oilangizni asrang”
• “Yot g‘oyalarga aldanmang”

Shuningdek, viloyat bosh imom-xatibi o‘rinbosari Xayrullo domla Sattarov “Islom Nuri” jome masjidida “Tinchlik – oliy ne'mat” mavzusida ma'rifat va ruhiy quvvatga to‘la ma'ruza qildi.

Tahliliy yig‘ilish – amaliy natijalar

Yig‘ilish yakunida Payariq tumanidagi 65 mahallaning ijtimoiy holati, aholining ehtiyojlari va muammolari tahlil qilindi. Masjid hujjat yuritishi, obodonchilik ishlari va jamoat bilan muloqot sifatini oshirish borasida aniq yo‘nalishlar belgilab berildi.

Rahbarlar tomonidan aholi bilan yaqin hamkorlik qilish, diniy-ma'naviy muhitni sog‘lomlashtirish va xayr-saxovat ishlarini yanada kengaytirish bo‘yicha qat'iy ko‘rsatmalar berildi.

Yakun va duo

Tadbir so‘ngida barcha ishtirokchilar yurtimiz tinchligi, osmonimiz musaffoligi va yurtboshimiz olib borayotgan xayrli ishlariga zafarlar tilab, birgalikda xayrli duo qildi.

Bu sayyor yig‘ilish Payariq ahli uchun nafaqat amaliy yordam, balki ma'naviy ko‘tarinkilik, birdamlik va kelajakka ishonch ruhini uyg‘otgan yodda qolarli kun bo‘ldi.

O‘zbekiston musulmonlari idorasi Samarqand viloyat vakillgi Matbuot xizmati