E'TIROF
Islom dini ma'rifatini keng yoyish va ilmiy faoliyatlarni e'tirof etgan holda O‘zbekiston musulmonlari idorasi raisi, muftiy Usmonxon Alimov hazratlariga O‘zbekiston Xalqaro Islom akademiyasi “Faxriy doktori” ilmiy darajasi berildi. Shu munosabat bilan O‘zbekiston musulmonlari idorasi Ulamolar Kengashi a'zolari muftiy hazratlarini samimiy muborakbod etadi.

Haqiqatan yurtimizda Islom dini ma'rifatini keng yoyish va xalqimiz ma'naviyatini yuksaltirishda diyorimiz olimu ulamolari, xususan muftiy hazratlarining hissalari juda ham katta. Hazrat butun umrlari davomida muborak dinimiz ta'limotlarini tarqatish bilan shug‘ullanib kelmoqdalar. U kishi Samarqand viloyati Payariq tumanida joylashgan “Imom Buxoriy” ziyoratgoh-jome masjidi imom-xatibi, Samarqand viloyati bosh imom-xatibi vazifalarida ko‘p yillar samarali mehnat qilganlar. 2006 yilda O‘zbekiston musulmonlari idorasi raisi, muftiy lavozimiga tayinlanib, mana 15 yildan buyon dini mubinimiz va mo‘min-musulmonlar xizmatida bo‘lmoqdalar.

Ta'kidlash joizki, muftiy hazratlari nafaqat mamlakatimiz, balki dunyo miqyosidagi obro‘-e'tiborli ulamolardan biridir. Hazrat 2013 yilda Diniy idora tarixida ilk bor Islom olami uyushmasi ta'sis majlisining a'zosi hamda Butun dunyo ulamolar kengashi a'zosi etib saylanganlar. Shuningdek, 2021 yil 17 martdan O‘zbekiston Xalqaro Islom akademiyasi huzuridagi Imom Moturidiy xalqaro ilmiy-tadqiqot markazi Xalqaro ilmiy hay'ati raisi hisoblanadilar.
Mana shunday xizmatlari e'tirof etilib, O‘zbekiston Respublikasi Prezidenti Shavkat Mirziyoevning 2020 yil 1 yanvardagi Farmoniga asosan islomiy tamoyillarga sodiqligi, urf-odatlarni asrab-avaylash, yosh avlodni umuminsoniy g‘oyalar, Vatanga sadoqat ruhida tarbiyalash ishiga katta hissa qo‘shgani, muborak Islom dinining insonparvarlik g‘oyalarini keng targ‘ib qilib kelayotganlari uchun muftiy Usmonxon Alimov hazratlari “El-yurt hurmati” ordeni bilan mukofotlandilar.
2021 yil 19 aprelda muftiy hazratlari Davlatimiz Rahbarining 2016 yil 28 dekabrda “O‘zbekiston faxriylarni ijtimoiy qo‘llab-quvvatlash “Nuroniy” jamg‘armasi faoliyatini yanada takomillashtirish chora-tadbirlari to‘g‘risida”gi Farmoniga muvofiq, ta'sis etilgan birinchi darajali “Mehnat faxriysi” ko‘krak nishoni sohibi bo‘ldilar.
Islom dini ma'rifatini keng tarqatish ishlar uchun Rossiya Federatsiyasi Sverdlovsk viloyati musulmonlari idorasi tomonidan “Kumush yarim oy” medali, Qirg‘iziston musulmonlari idorasining 1-darajali «Intimoq» medali («Ittifoq») bilan ham taqdirlanganlar.

So‘nggi yillarda muftiy hazratlari xalqaro e'tibor va ehtirom sabab Ummon Sultonligi Islomiy strategik tadqiqotlar markazi tomonidan e'lon qilinadigan “Dunyoning eng nufuzli 500 musulmoni” ro‘yxatidan 12 yildan buyon munosib o‘rin egallab kelmoqdalar.

Muftiy hazratlari Islom dini ma'rifatining tolmas targ‘ibotchisi hamdir. U kishi yurtimiz masjid va madrasalari diniy ta'lim tizimida islohotlarni amalga oshirish, o‘quv rejalari va dasturlarini tayyorlash hamda ularni hayotga tatbiq etish ishlariga bevosita boshchilik qilmoqdalar. Bundan tashqari, xorijiy mamlakatlarda bo‘lib o‘tadigan xalqaro anjumanlarda ilmiy asoslangan mazmunli ma'ruzalari bilan muntazam ishtirok etmoqdalar.
Muftiy hazratlari yurtimizda chop etiladigan diniy mavzudagi gazeta-jurnallar tahrir hay'atlarining a'zosi, nashr etilayotgan diniy kitoblarning mas'ul muharriri sifatida ham islom ma'rifati targ‘ibotiga katta hissa qo‘shmoqdalar. O‘ttizga yaqin asar va yuzdan ziyod ilmiy-ommabop maqolalar muallifi hisoblanadilar.

Qur'oni karim oyatlari ma'nolarini tarjima va tafsir qilish ishi juda ham mashaqqatli, mas'uliyatli va ayni vaqtda sharafli vazifadir. Shu ma'noda, xalqimizning Qur'oni karimga bo‘lgan ehtiyojini ta'minlash yo‘lida muftiy hazratlari tomonidan Qur'oni karimning ma'nolari tarjimasi va tafsiri kitobi ta'lif etilgan “Tafsiri Irfon” kitobida Qur'oni karim oyatlari bugungi voqeligimizga moslab, xalqchil tilda, ayni chog‘da, yuksak ilmiy mahorat bilan tarjima va tafsir etilgan.
Darhaqiqat, Islom dinining ezgu ta'limotlarini barchaga go‘zal shaklda yetkazish savobi ulug‘ amallardan hisoblanadi. Alloh taolo Qur'oni karimda O‘z diniga xizmat qiluvchilarni shunday ifoda etadi:

يَا أَيُّهَا الَّذِينَ آَمَنُوا إِنْ تَنْصُرُوا اللَّهَ يَنْصُرْكُمْ وَيُثَبِّتْ أَقْدَامَكُمْ

“Ey, imon keltirganlar! Agar sizlar Allohga yordam bersangiz (dinining rivoji uchun harakat qilsangiz), U ham sizlarga yordam berur va qadamlaringizni sobit (barqaror) qilur” (Muhammad, 7).
Islom dini yo‘lida soch-soqoli oqargan mo‘ysafid odamlar haqida Hazrati Payg‘ambarimiz sollallohu alayhi vasallam:

مَنْ شَابَ شَيْبَةً فِي الْإِسْلَامِ كَانَتْ لَهُ نُورًا يَوْمَ الْقِيَامَةِ

“Islom yo‘lida kimning sochiga oq tushgan bo‘lsa, Qiyomat kuni unga nur bo‘ladi”, deya marhamat qilganlar (Imom Termiziy rivoyati).
Islom dini ravnaqiga salmoqli hissa qo‘shayogan, dovrug‘i nafaqat O‘zbekiston balki qo‘shni va xorij mamlakatlarida ham ma'lum bo‘lgan Muftiy hazratlarining serqirra faoliyatlari barchamizning faxru iftixorimizdir.
O‘zbekiston musulmonlari idorasi Ulamolar Kengashi a'zolari nomidan muftiy Usmonxon Temirxon o‘g‘li hazratlarini Xalqaro Islom akademiyasi “Faxriy doktori” ilmiy darajasi berilgani munosabati bilan muborakbod etamiz. Alloh taboraka va taolodan u kishiga din, millat va Vatan yo‘lidagi xizmatlari va ilmiy ijodlarida muvaffaqiyatlar bardavom bo‘lishini tilaymiz!

O‘zbekiston musulmonlari idorasi