Xabar berganimizdek, bugun, 25 iyul kuni O‘zbekiston musulmonlari idorasi raisi, muftiy Nuriddin domla hazratlari Samarqand shahriga tashrif buyurdilar.

Muftiy hazratlarini Samarqand temir yo‘l vokzalida viloyat bosh imom-xatibi Zayniddin domla Eshonqulov kutib olib, safar davomida hamrohlik qilmoqda.

Tashrif davomida Muftiy Nuriddin domla hazratlari “Xo‘ja Is'hoqi Vali” masjidida bo‘lib, jamoat bilan peshin namozini ado etdilar.

Namoz va duolardan so‘ng Zayniddin domla Eshonqulov jamoatga Muftiy hazrat boshchiligidagi ulamolar tashrifi, ularning ma'ruza, pand-nasihatlaridan foyda olishga harakat qilish lozimligi haqida gapirdi. Shuningdek, Muftiy hazratga tashrif uchun minnatdorlik bildirib, mav'iza qilib berishlari uchun minbarga taklif etdi.

Muftiy hazratlari so‘zlari avvalida viloyatga tashrifning ilk uchrashuvidayoq ushbu jome qavmi bilan suhbat bo‘layotganidan xursand ekanlari, ulamolar olis va chekka hududlardagi aholi vakillari bilan yuzma-yuz muloqotlar, taniqli ulamolar ishitirokida jome masjidlarda suhbatlar o‘tkazish, hudud ahlini yurtimizda bo‘layotgan o‘zgarishlar mazmun-mohiyati haqida xabardor qilish bilan bir qatorda, ularning dardu tashvishlariga ko‘maklashish, fikr-mulohazalarini tinglash va diniy sohaga tegishli muammolarini joyida o‘rganib, bartaraf etish ham ko‘zda tutilganini bayon qildilar.

Shundan so‘ng Muftiy hazratlari xolis amalning ikki dunyoda foydasi, aksincha riyo, sum'a aralashgan amalning ofati haqida oyat-hadis va hayotiy misollar ila go‘zal ma'ruza qilib berdilar. Jumladan, Alloh uchun qilingan amal duo mustajob bo‘lishiga vasila ekanini aytib, quyidagi ibratli voqeani so‘zlab berdilar:

“Ibn Umar roziyallohu anhumodan rivoyat qilinadi. “Nabiy sollallohu alayhi vasallam dedilar: “Uch kishi piyoda yo‘lga chiqdi. Keyin yomg‘irda qolib, tog‘dagi bir g‘orga kirib olishdi. Birdan oldilariga (g‘or og‘ziga) bir xarsang tushdi. Shunda ular bir-birlariga: «Allohga o‘zingiz qilgan eng afzal amal ila duo qilinglar», deyishdi. Ulardan biri: «Allohim! Mening yoshi ulug‘, keksa ota-onam bor edi. Men chiqib, qo‘y boqar edim, keyin kelib, sut sog‘ar va uni ota-onamga olib kelar edim. Uni ular ichishardi, so‘ngra go‘daklarim va ahlu ayolimga ichirar edim. Bir kecha ushlanib qoldim. Kelsam, ikkovlari ham uxlab qolishibdi. Ularni uyg‘otgim kelmadi. Bolalar esa oyog‘im ostida izillab yig‘lashar edi. Men ham, ota-onam ham tong otguncha shu holda bo‘ldik. Allohim, agar meni shu ishni Sening roziligingni istab qilgan, deb bilgan bo‘lsang, bizga bir tirqish ochgin, undan osmonni ko‘raylik», dedi. Shunda ularga tirqish ochildi. Boshqasi esa: «Allohim, O‘zing bilasanki, men amakimning qizlaridan birini erkak kishining ayollarni eng qattiq sevishidek sevar edim. (Qiz) «Yuz dinor bermaguningcha bunga yetisha olmaysan», dedi. Men shunga (pulga) urinib yurib, nihoyat uni to‘pladim. Keyin uning ikki oyog‘i orasiga cho‘kkalaganimda, u: «Allohdan qo‘rq! Haqini bermay turib muhrni ochma!» dedi. Shunda men o‘rnimdan turib ketdim va uni tark etdim. Agar meni shu ishni Sening roziligingni istab qilgan, deb bilgan bo‘lsang, bizga bir tirqish ochgin», dedi. Shunda ularga uchdan ikki qism ochildi. Keyingisi: «Allohim! O‘zing bilasanki, men bir faraq* makkajo‘xori evaziga mardikor yollagan edim. Keyin unga shuni bergan edim, olishdan bosh tortdi. Men o‘sha bir faraqni ataylab ekib, shuning orqasidan sigirlar va ularning molboqarini ham sotib oldim. Keyinroq u kelib: «Ey Allohning bandasi, haqimni ber», dedi. Men: «Anavi sigir va uning molboqariga bor, ular seniki», dedim. U: «Meni masxara qilyapsanmi?» dedi. Men: «Seni masxara qilayotganim yo‘q, ular seniki», dedim. Allohim, agar meni shu ishni Sening roziligingni istab qilgan, deb bilgan bo‘lsang, bizni qutqargin», dedi. Shunda ularga (yo‘l) ochildi». * Faraq – o‘n olti ratl (olti yarim litrdan ko‘proq) suv sig‘adigan mis idish. U Hijozda shu nom bilan yuritilgan” (Ikki shayx va Nasaiy rivoyati).

Suhbat davomida Muftiy hazratlari ushbu hadisdagi voqeani misol qilib har kim o‘ziga mening ana shunday faqat Haq taolo roziligi uchun qilgan amalim bormi, deya savol berishi lozimligini ta'kidladi. Mazmunli va ta'sirli ma'ruzani qavm diqqat bilan tinglab, ko‘zlari namlanib, qalblari yumshadi. Shuningdek, o‘zlarini qiziqtirgan savollarga batafsil javob olishdi.

Yakunda Haq taolodan yurt tinchligi, xalq farovonligini so‘rab duoi xayrlar qilindi.

O‘zbekiston musulmonlari idorasi Samarqand viloyat vakilligi Matbuot xizmati