Ha, jahonning eng katta minbaridan o‘zbek tilining yangrashi ulkan tarixiy hodisadir!

 

Ayniqsa, Prezident nutqidan o‘rin olgan Markaziy Osiyo mintaqasining qadimiy va boy madaniy merosini asrab-avaylab, butun insoniyatga yetkazish, uning qadr-qimmatini kelajak avlodlarga ham tushuntirish borasida 2021 yilda YUNYESKO bilan hamkorlikda ko‘hna Xiva shahrida “Markaziy Osiyo jahon sivilizatsiyalari chorrahasida” mavzuida xalqaro forum o‘tkazish taklifi muhim ahamiyat kasb etadi. Binobarin, Xorazm o‘lkasining ushbu xalqaro tadbir uchun tanlanishi ham bejiz emas. Xususan, Xorazm zaminining jahon tamaddunida tutgan o‘rni va ahamiyatini ilmiy-nazariy jihatdan mukammal o‘rganish ishlarining amalga oshishida ushbu taklif g‘oyat muhimdir.

 

Shuningdek, qo‘shni Afg‘onistondagi tinchlik va barqarorlik masalasida O‘zbekiston yil sayin bir-biridan muhim, ulkan ishlarning samarali amalga oshishida alohida jasorat va fidoiylik ko‘rsatib kelmoqda. Afsuski, shuncha urinishlarga qaramay, qo‘shni Afg‘onistonning tinch-totuvligi mudom dunyo hamjamiyati diqqat markazida asosiy masala bo‘lib qolmoqda.

 

Davlatimiz rahbari o‘z nutqida: “Bu borada “Beqaror va vayronkor vaziyatdan – tinchlik va bunyodkorlik sari” degan tamoyil asosida ish olib borish muhimdir” dedi va BMT huzurida afg‘on xalqining dardu hasratiga malham bo‘ladigan, ularni tinglaydigan va muntazam faoliyat ko‘rsatadigan qo‘mita tashkil etish taklifini ilgari surdi.

 

O‘zbekiston Respublikasi Prezidenti nutqining yana bir yo‘nalishiga ko‘ra, Orolbo‘yi mintaqasini ekologik innovatsiya va texnologiyalar hududi deb e'lon qilish orqali Orol og‘riqlarini yengillatish va bu borada BMT Bosh Assambleyasining maxsus rezolyutsiyasini qabul qilish taklifi berildi. Ayni muhim hujjat qabul qilingan sanani esa Xalqaro ekologik tizimlarni himoya qilish va tiklash kuni sifatida nishonlash ushbu dardli muammoga nisbatan jahon hamjamiyatining e'tiborini yanada kuchaytiradi.

 

Prezidentimiz so‘zining oxirida bugungi kunda inson hayoti uchun muhim masalalardan biri – qashshoqlik va kambag‘allikka qarshi kurashish g‘oyasini BMT Bosh Assambleyasi navbatdagi sessiyasining asosiy mavzularidan biri sifatida belgilash masalasini ko‘tardi hamda ushbu og‘riqli mavzuga bag‘ishlangan global sammit o‘tkazish taklifini kiritdi.

 

Bugungi kunda o‘ta dolzarb bo‘lgan ushbu og‘riqli masalaga jahon hamjamiyati bilan birgalikda choralar ko‘rish, qilinayotgan ishlardan ko‘ra yana samarador yo‘llarni izlash, jahon tajribasini qo‘llashdek tizimli chora-tadbirlarni amalga oshirishni taqozo qiladi. Bir necha yuz yillardan buyon dunyoning barcha nuqtalarida beayov hukm surayotgan qashshoqlik va kambag‘allik muammosini shu kunga qadar hech qaysi davlat rahbari bunchalik jiddiy ko‘tarmagan edi. O‘zbekiston Respublikasi Prezidenti ushbu muammoni ochiq va dadil ko‘tarib chiqar ekan, boshqa mamlakatlarni ham bu masalaga qat'iy e'tibor berishga va uning yechimini topish yo‘llarini izlashga chaqirdi.

 

Ta'kidlash kerakki, O‘zbekiston Prezidenti tomonidan ilgari surilgan qator tashabbus va takliflar dunyo hamjamiyati tomonidan keng qo‘llab-quvvatlanib, hayotga tatbiq etib kelinmoqda. Bu galgi taklif va tashabbuslar ham shu kunning o‘zidayoq ko‘pchilik tomonidan ma'qullandi va amalga oshirilishi hayotiy zarurat bo‘lgan ishlar sifatida keng e'tirofga sazovor bo‘ldi. Albatta, ushbu tashabbus va takliflarning hayotga tatbiq etilishida aynan BMTning qo‘llab* quvvatlashi, hamfikrligi va ko‘magi juda muhimdir. Shuning uchun Birlashgan Millatlar Tashkilotining muvofiqlashtiruvchi xalqaro tuzilma sifatidagi markaziy o‘rnini yanada kuchaytirish zarurligi alohida qayd etildi.

 

Barchamizni behad quvontirib, qalbimizni g‘urur-iftixorga to‘ldirgan va jahon minbarida turib aytilgan bu ezgu taklif va g‘oyalar o‘zbek tilida jarangladi! Ha, bu tarixiy nutq o‘zbekman, o‘zbekistonlikman degan har bir insonni to‘lqinlantirdi.