— Ba'zida namoz vaqtida 3 rakat o‘qidim-mi yo 4 rakat-mi, deb ikkilanib qolaman (xayol bo‘linadi yoki esdan chiqib qoladi). Keyin davom etib ketaveraman, lekin ko‘nglimda xijillik qoladi. Shunday paytda nima qilishimiz kerak? Davom ettiraversam to‘g‘rimi yo boshidan o‘qish kerak-mi?

— Namozxon namozda necha rakat o‘qiganini bilmay, shubha qilsa, bu uning umridagi birinchi unutishi bo‘lsa, namozini yangidan boshlaydi. Agar shubhasi ko‘paygan bo‘lsa, gumonining g‘olib tarafini oladi. Agar unutishi ko‘p bo‘lsa, g‘olib gumonga bino qiladi. Agar g‘olib gumoni bo‘lmasa, ozini oladi.

Abu Sa'iyd Xudriy roziyallohu anhudan rivoyat qilinadi. Rasululloh sollallohu alayhi vasallam: “Qachon biringiz namozda shakka tushib qolsa, bas, qancha o‘qiganini bilmay qolsa, uch rakatmi, to‘rt rakatmi? Bas, shakni tashlasin va o‘zi qattiq ishongan tomoniga bino qilib o‘qisin. So‘ngra salom berishidan oldin ikki marta sajda qilsin. Agar besh rakat qilgan bo‘lsa, o‘sha ikki sajda uning namozini juftga aylantiradi. Agar to‘rt rakatni tamom qilish uchun o‘qigan bo‘lsa, u ikki sajda shaytonning burnini yerga ishqagan bo‘ladi”, dedilar (Imom Muslim, Imom Abu Dovud, Imom Ahmad rivoyati).

Muhammad Ayyub HOMIDOV