Аллоҳ таоло инсониятни махлуқотлар ичида энг мукаррами қилиб қўйди ҳамда кўпгина неъматлари билан неъматлантирди. Шунинг билан бирга шу неъматларига шукр қилишни ҳам Ўз каломида таъкидлаб ўтди. Жумладан, Аллоҳ таоло Қуръони каримда шундай марҳамат қилади: “Яна Роббингиз эълон қилган (бу сўзлар) ни эслангиз: «Қасамки, агар (берган неъматларимга) шукр қилсангиз, албатта, (уларни янада) зиёда қилурман. Борди-ю, ношукрчилик қилсангиз, албатта, азобим (ҳам) жуда қаттиқдир”.

Неъматларга шукр қилиб яшаш, нолимаслик, борига қаноат қилиб яшаш каби тушунчалар бизларга қадимдан ота-боболаримиз ўгитлари-ю насиҳатлари орқали онгу шууримизга сингиб кетган. Биз бу амал ниҳоятда савобли амал эканини яхши биламиз. Минг афсуслар бўлсинки, ҳозирги кунда орамизда Аллоҳ таолонинг биз бандаларига инъом этган бу чексиз неъматларига шукр қилмасдан, борига қаноат қилиб яшамасдан гуноҳкор бандалар қаторида бўлиб қолаётган кишилар ҳам йўқ эмас. Зеро, Пайғамбаримиз соллаллоҳу алайҳи васаллам ўз ҳадиси-шарифларида шундай марҳамат қиладилар: “Иситма қилганингизда ношукр қилиб сўкманг, Аллоҳга қасамки, албатта иситма мўмин банданинг гуноҳини кетказади, гўёки олов темирнинг зангини кетказгани каби”.

Агар биз ношукрлик қилиб, яшаётган ҳолимиз, кунимизга шукр қилмай кун кечирадиган бўлсак, оиламиздан барака кўтарилар экан. Демак, бутун бир жамият шундай яшасачи? Унда бутун бир жамиятдан, юртдан барака кетади азизлар!

Тарихга назар соладиган бўлсак, ҳар қандай қандай таҳликали, очлик даврларида ҳам ота-боболаримиз ҳеч қачон ношукрлик қилмаганлар. Ҳаттоки, устларига киядиган кийимлари бўлмаса ҳам сабр қилиб, Аллоҳдан сўраганлар. Бундай хайрли амаллари ўлароқ, ҳуларнинг ҳаётларида, оилаларида барака зиёдаси билан бўлганлиги барчамизга маълум. Шундай экан азизлар, Аллоҳнинг неъматларига шукр қилиб, бор бўлганда шукр қилиб, йўқчиликда сабр қилиб яшайлик. Шундагина биз Аллоҳ таолонинг суйган бандалари қаторида бўламиз инша Аллоҳ. Аллоҳ таоло барчаларимизни Ўзининг неъматларига шукр қилувчи бандаларидан қилсин!!!

Исроил Амириллаев Пахтачи тумани бош имом-хатиби