Она сути — бола учун Аллоҳ томонидан яратилган энг мукаммал озуқа бўлиб, Ислом шариатида ҳам, тиббиётда ҳам унинг аҳамияти жуда улуғ ҳисобланади. У нафақат боланинг танаси ва иммунитетини мустаҳкамлайди, балки унинг руҳият ва маънавиятига ҳам таъсир этади.
Ислом шариатида она сутининг қадри Қуръон оятлари ва Пайғамбаримиз соллаллоҳу алайҳи васаллам ҳадисларида очиқ баён қилинган.

Аллоҳ таоло:
۞ وَالْوَالِدَاتُ يُرْضِعْنَ أَوْلَادَهُنَّ حَوْلَيْنِ كَامِلَيْنِ
«Оналар фарзандларни тўлиқ икки йил эмизадилар.» (Бақара, 233) деб буюради. Бу оят эмизишнинг муҳимлиги ва фойдасига ишора қилади.

Бароъ разияллоҳу анҳу айтадилар:
Иброҳим алайҳиссалом (Пайғамбаримиз соллаллоҳу алайҳи васалламнинг ўғиллари) вафот этганида, Расулуллоҳ соллаллоҳу алайҳи васаллам дедилар:
“Албатта (Иброҳим) учун жаннатда уни эмизувчи бор.”деганлар.
Бу эса она сути жуда муҳим зарур ва фойдали эканини билдиради.

Фиқҳий жиҳатдан, икки йил ичида бола бошқа аёлнинг кўкрагидан эмса, у аёл ҳам, унинг фарзандлари ҳам болага маҳрам ҳисобланади ва улар билан никоҳ ҳалол бўлмайди. Чунки битта онадан эмган шахслар “ҳамшира” бўлиб, маҳрамлик ҳукми жорий бўлади. Бизнинг Ҳанафий мазҳабимизда бола она кўкрагини оғзи билан ушласа ҳам маҳрамлик собит бўлади; Шофеий мазҳабида эса бу ҳукм беш марта эмизиш билан вужудга келади. Бу масала фиқҳ китобларимизда батафсил баён қилинган.
Оналар болани эмизмай, бошқа турли озуқалар билан ўстирса, аввало ўз саломатлигини хавф остига қўяди — кўкрак бези саратони хавфи ошади. Болага ҳам катта таъсири бор: иммунитети паст бўлади ва
ҳоказо.
Она сутининг тиббий фойдалари замонавий тиббиётда исботланган. У боланинг иммунитетини мустаҳкамлайди, инфекциялардан ҳимоя қилади, аллергия ва ичак касалликларини камайтиради, бола миясининг ривожланишига керакли омилларга бой ва боланинг ўсиши учун табиий мувозанатдаги моддаларни ўз ичига олади. Шунингдек, она учун ҳам фойдаси катта: бачадоннинг тез тикланиши, кўкрак саратон хавфининг камайиши, ортиқча вазндан халос бўлиш ва руҳий хотиржамликка ёрдам бериши улар жумласидандир.

Она сути бола билан она ўртасидаги меҳр, ишонч ва руҳий боғлиқликни мустаҳкам қилади. Бу боғланиш келажакда боланинг руҳий барқарорлиги, ишончи ва шахсиятига ижобий таъсир қилади. Имом Ғаззолий ҳам она сути орқали болага фақат озуқа эмас, балки онадан ахлоқ ва руҳий таъсир ўтишини қайд этган.

Замонавий ҳаётда, айниқса шаҳарларда, эмизишда қийинчиликлар юзага келмоқда: иш жойларида шароитлар етишмаслиги, оналик таътилининг қисқалиги, стресс, тезкор турмуш тарзи. Бундай вазиятларда махсус эмизиш хоналари, иш жойида оналар учун қулайликлар яратиш каби ечимлар ҳал қилиш зарурдир.

Хулоса қилиб айтганда, она сути – бола учун жисмоний ва маънавий жиҳатдан энг соғлом, табиий ва мукаммал ризқдир. Шариат ҳам, тиббиёт ҳам уни биринчи ўринга қўяди. Ҳар бир мусулмон ота-онага тавсия қилинади: имкони борича болани она сути билан эмизинг. Чунки она сути фарзанднинг соғлом, кучли ва руҳан барқарор бўлиб улғайиши учун энг катта сармоядир.
Меликов Абдуллоҳ манбалар асосида таёрлади