Маълумки, 2022 йилда халқимиз неча юз йиллик тарихи давомида орзу қилиб, интилиб яшаган ва ХХ аср сўнггида эришган, мамлакатимиз ҳаёти ва тақдирида туб бурилиш ясаган, том маънодаги буюк, оламшумул воқеа – Ўзбекистон Республикаси давлат мустақиллиги эълон қилинганига ўттиз бир йил тўлади.

Мустақиллик, тинчлик ва тараққиёт. Бу улуғ тушунчалар доимо ёнма-ёндир. Халқимизнинг тарихий ютуғи – Ватанимиз мустақиллигининг ўттиз бир йиллиги кенг нишонланаётган шу кунларда бу ҳақиқат яна бир бор ўз ифодасини топмоқда.

Ҳар қандай замонда одамзот нафақат моддий фаровонлик ва жисмоний қулайлик сари интилади. Киши учун ўз қадрини билиш, унинг ҳуқуқ ва эркинликлари ҳар доим муҳим бўлган ва муҳим бўлиб қолади. Миллий ўзлигини англаш одамнинг энг муҳим эҳтиёжларидан бири бўлиб қолади. Одамлар бир давлатга қарам бўлишнинг ҳар қандай шаклига доимо қарши бўлишган. Зеро, давлат мустақиллиги – бу халқнинг ўз келажагини ўзи белгилаш ҳуқуқидир. Бу ҳуқуқ барчанинг ўз юрти ва халқи тақдири олдидаги масъулиятини ҳам англатади.

Мустақилликка эришиш – бу фақатгина давлатчилик тарихи эмас. Бу халқ тарихи ҳамда ҳаёти ўзгаришлар даврига тўғри келган инсонлар тақдиридир.

Тинчлик – тараққиёт калити. У бўлмаган жойда қут-барака, ривожланиш, тараққиёт бўлмайди.

Давлатимиз раҳбарининг 2022 йил 1 августда имзолаган "Ўзбекистон Республикаси давлат мустақиллигининг ўттиз бир йиллик байрамига тайёргарлик кўриш ва уни юқори савияда ўтказиш тўғрисида"ги қарори юртдошларимиз томонидан катта мамнуният билан кутиб олинди. Зеро, мустақиллик ўзликни англаш, ўз ватанида эмин-эркин яшаш, миллат равнақи ва давлат тараққиёти йўлида фидойилик кўрсатиш демакдир.

Тарихан қисқа даврда Ўзбекистон илгариги ўзини боқишга, ўзини ҳимоя қилишга қурби етмаган, иқтисодиёти бирёқлама ривожланган, пахта яккаҳокимлиги ҳалокатли тус олиб, аҳолининг ҳаёт даражаси ғоят ачинарли аҳволга тушиб қолган қолоқ республикадан бугунги кунда тез ва барқарор суръатлар билан тараққий этиб бораётган, жаҳон ҳамжамиятида ўзига муносиб ўрин эгаллаган, қудратли давлатга айланиб бормоқда.

Замонлар ўтади, мамлакатимизда янги-янги авлодлар дунёга келади. Аждодларимизнинг, халқимизнинг асрий орзу-умидларини рўёбга чиқарган, эркин ва обод Ватан барпо этиш йўлида қанот бўлиб, беқиёс имконият ва истиқболларни очиб берган бу кун юртимиз тарихида мангу буюк сана бўлиб қолади. 

Барчаларингизга Ўзбекистон Республикаси мустақиллигининг ўттиз бир йиллик байрами муборак бўлсин. Жонажон Ватанимиз, хонадонларимиздан тинчлик-осойишталик, файзу барака ҳеч қачон аримасин! Юртимиз тинч, осмонимиз мусаффо, мустақиллигимиз абадий бўлсин, азиз юртдошлар!

Н.Темирова Самарқанд вилояти бош имом хатибиниг хотин-қизлар масалалари бўйича маслаҳатчиси