Баро ибн Озиб розияллоҳу анҳудан ривоят қилинади:
“Набий саллоҳу алайҳи васалламнинг ҳузурларига бир аъробий келди ва:
“Мени жаннатга киритадиган амални ўргатинг”,-деди.
“Гапни қисқа қилсанг ҳам,сўровини кенг қилдинг. Жонни озод қил. Бўйинни еч”,-дедилар.
“Ё Расулуллоҳ! Иккиси бир эмасми?”-деди.
“Йўқ! Жонни озод қилиш бир ўзинг уни қулликдан чиқаришингдир. Бўйинни ечиш баҳосида ёрдам беришингдир.Серфойда маниҳа . Золим қариндошга қайтиш. Агар бунга қурбинг етмаса, очга таом бер. Чанқоқни сероб қил. Амру маъруф қил. Наҳий мункар қил. Бунга ҳам қодир бўлмасанг,тилингни яхшиликдан бошқадан тий”-дедилар”.

Ушбу хадиси шарифда жаннатга киритадиган бир нечта амал зикр қилинмоқда.
1. Жонни озод қилиш. Яъни қулни қуллик занжиридан озод қилиш.
2. Бўйинни ечиш, хожаси билан озод қилиш учун маълум миқдорда маблағга шартнома қилган қулга моддий ёрдам бериш.
3. Серфойда маниҳа. Бирор ҳайвонни фойдаланиш учун бериб туриш. Серфарзанд ёки камбағал оилага сутидан ёки хизматидан фойдаланиш учун бирор ҳайвонни бериб туриш ҳам жаннатга киритадиган амаллардан экан.
4. Золим қариндошга қайтиш. Қариндошлик алоқасини узган қариндошлар билан алоқани тиклаш. Қариндошга яхшилик-фақат унга бирон яхшилик қилиш эмас. Балки унинг зулмига чидаш, ундан етадиган ёмонликларга яхшилик билан жавоб қайтариш.
5. Очга таом бериш. Бу амал ҳам жаннатга киритадиган амаллардан экан.
6. Чанқоқни сероб қилиш. Чанқаган кишига сув бериш ҳам кишини жаннатга киритадиган амаллардан экан. Бу хусусда саҳобалар ҳаётида ибратли воқеалар жуда кўп.
7. Амру маъруф қилиш. Жамиятнинг яхши бўлиши, муваффақиятга эришиш учун инсонлар доим бир-бирларини яхшиликка чақириб туришлари лозим.
8. Наҳйу мункар. Бу ҳам ҳеч қачон долбзарблигини йўқотмайдиган амалдир.Инсонлар бир-бирларини ёмонликдан қайтарар эканлар, доимо яхшиликда бардавом бўладилар.
9. Тилни яхшиликдан бошқасидан тийиш. Бугунги кунда ҳамма муҳтож бўлиб турган нарса шу, аслида. Кўп муаммолар тилни тиймасликдан, яхшиликни кам гапириб, бошқасини кўп гапиришдан келиб чиқади.
Ушбу ҳадисга амал қилиб, фақат яхши гапларни гапириш ва жаннатга киритадиган амалларда бардавом бўлмоқликни насиб қилсин.

Назаров Анвар - Каттақўрғон шаҳар "Муҳаммад Нақиббек" жоме масжиди имом-хатиби