Ер юзида одамзод пайдо бўлибдики, унинг бошидан турли хил синовлар ўтди ва ўтмоқда. Баъзилари Аллоҳ таолога осийлик қилишиб ер юзидан буткул йўқолиб кетишди. Баъзилари эса Аллоҳ таолонинг розилигини топиш йўлида ғайрат қилишди ва юксак мақомларга эришди. Аллоҳ таолонинг рахмати бандалари учун ниҳоятда кенг эканлигини яхши биламиз. Бу ҳақда Аллоҳ таоло ўз каломида, “Агар берган неъматларимни санайман десаларинг, ҳаргиз уддасидан чиқа олмайсизлар”, деб марҳамат қилган. Демак берилган неъматларни ҳатто саноғига ета олмас эканмиз, мана шу неъматларга шукр қилишимиз лозим.

Мана шундай неъматлардан бири бу Тинчлик неъматидир. Ҳозирги вақтда ахборот оқими жадал суратда ривожланиб бормоқда. Дунёдаги бўлаётган хабарлар бир зумда ошкор бўлиб, ундан барча хабардор бўлмоқда. Юртимизда ҳам бу соҳада ишлар олиб борилмоқда ва аҳоли бўлаётган воқеалардан хабардор бўлишмоқда. Хабарнинг ҳам турличаси бўларкан. Баъзиларидан кўнглингиз тоғдай кўтарилса, баъзиларидан қаттиқ ранжир экансиз.

Ислом дини инсониятни фақат ва фақат яхшиликка, эзгуликка олиб борадиган диндир. Ислом дини билан шарафланган киши фақат яхшилик қилади. Диний соҳа ходимлари ҳам, уламоларимиз ҳам, олимлару имомларимиз ҳам фақат яхшиликка хизмат қилишади. Мана шу хизматлар эътироф қилинмоқда, ижобий хулосалар берилмоқда ва юртга хизмат қилганлар қаторида имом хатибларимиз ҳам мукофотлар билан тақдирланмоқда. Лекин танганинг иккинчи томони бўлганидек, мана шундай тинчлик, яхшиликларни кўра олмайдиган ғаламис кимсалар ҳам топилар экан. Айниқса диний соҳа ходимларига, жумладан, имомларимизга ҳам маломат тошларини отадиганлар топилар экан. Бу ҳолатларни ижтимоий тармоқларда кузатиш мумкин. Энг ачинарлиси, мана шу хабрларга кўр кўрона ишониб, эргашиб кетадиганларнинг борлиги кишини ўйлантиради. Юртимиздаги минглаб масжидларда имом хатибларимиз томонидан огоҳлик, фитналарга алданиб қолмаслик тўғисида кўп гапирилишига қарамасдан, шу каби иллатларга аралашиб қолаётганлар борлиги ачинарли ҳолат.

Ҳидоят журналининг 7 сонида бир мулоҳаза келтирилган.” Домлаларимизни танқид қилган, уларга ажратилган маблағга ҳасад қилган кимса ҳам йўл-йўлакай қачондир, қайсидир масжидда, қайсидир имомга иқтидо қилиб, унинг ортидан намоз ўқигандир. Мазҳаббошимиз Имоми Аъзам рахматуллоҳи алайҳ, “Кимки ўзи иқтидо қиладиган имомнинг ортидан гапириш у ёқда турсин, ҳатто бу ҳақда хаёлидан ўтказса, ўқиган намози қабул бўлмайди”, деганлар. Аллоҳ асрасин.”

Имом хатибларимиз ва диний соҳа ходимларининг элу юрт учун хизматлари катта. Инсон тўғилгандан то охирги манзилигача уларнинг хизматига мухтож. Шундай экан гапиришдан олдин бир ўйлаб, мулоҳаза қилиш лозим. Пайғамбаримиз саллоллоҳу алайҳи васаллам, “Олимлар Пайғамбарларнинг меросхўрларидир”, деб марҳамат қилганлар. Бу бежизга айтилмаган.

Алижон Яқубов - Иштихон туман бош имом хатиби