«سمعت الفقراء ببغداد يقولون: «إن ما نقلَه أهل التفسير من أن عيسى عليه السلام كان يخلق من الطين كهيئة الطير فينفخ فيه فيكون طائرا بإذن الله، فإذا طار شيئا سقط ميتا ولم تدم له حياة؛ لأن عيسى كان يَخلق ولا يَرزق، ولو رَزَق كما خَلق لم يبقَ أحد إلا قال: هو الله، فتنةً، إلا من آتاه الله هداه».

 القاضي ابن العربي المالكي

«Бағдод шаҳри фақирларининг: «Тафсир аҳлининг нақл қилишига кўра, Ийсо алайҳиссалом лойдан қуш тимсолини ясар ва унга пуфлар эдилар. У Аллоҳнинг изни ила қушга айланар эди. Бир муддат учганидан сўнг ўлик ҳолатда ерга қулар эди. Ҳаётда давом этмас эди. Чунки, Ийсо алайҳиссалом Аллоҳнинг изни ила яратар, бироқ ризқ бермас эдилар. Агар яратганларидек ризқ берганларида, Аллоҳ ҳидоят берганлардан бошқа бирор киши қолмай у зотни «У Аллоҳ» деб айтар ва фитналанар эди», деб айтганларини эшитганман».

 Қози Ибн Аробий Моликий роҳимаҳуллоҳ

Изоҳ: Аллоҳ таоло бандаларини турли йўллар билан синов майдонига ташлайди. Бу синовдан ҳамма ҳам муваффақиятли ўта олмайди. Аллоҳнинг фазли ва марҳамати ила Ўзи хоҳлаган бандаларигина бу синовдан муваффақиятли ўтадилар. Аллоҳ таолонинг марҳаматини қарангки, ҳар бир синовда ундан ўтиш йўлига ишора қилувчи белгиларни билдирган. Юқоридаги зикр қилинган гапда ҳам бунга гувоҳ бўлишимиз мумкин. Аллоҳ таоло Ийсо алайҳиссаломга ўликларни тирилтириш ва лойдан қуш тимсолини ясаш каби мўжизаларни берган ва бунда катта бир синовни яширган. Аллоҳнинг изни ила қушга айланган лойнинг ўлик ҳолатда ерга қулаши Ийсо алайҳиссаломнинг башар эканига ва буюк қудрат соҳиби фақат Аллоҳ таоло эканига далолатдир. Агар одамлар ақлларини ишлатмаганларида ва Аллоҳ таоло уларни ҳидоятидан маҳрум қилганида эди бу ҳолатни кўриб, оғир аҳволга ўзларини ташлаб қўйишган бўлар эди. Бироқ, Аллоҳ таоло меҳрибон ва фазли-карами кенг бўлган Зотдир. Бандаларига фақат иймоннигина рози бўлади. Уларга асло куфрни рози бўлмайди.

Аллоҳ таоло барчамизга фазли ва марҳамати ила муомала қилсин! Раззоқ сифати ила неъматлари билан ризқлантирсин!

Хайрулла домла Саттаров вилоят бош имом-хатиби ўринбосари