Аллоҳ таолонинг биз бандаларига инъом этган неъматлари чексиз. Булар учун қанча шукр келтирсак ҳам ҳаққини адо эта олмаймиз. Аллоҳ таоло Қуръони каримда инсонларни бу неъматларнинг қадрига етмай, унга шукр қилмайдиганлар ҳақида ҳам баён қилган.

Жумладан, Аллоҳ таоло “Иброҳим” сурасининг 34-оятида: “Ва У сизга барча сўраган нарсаларингиздан берди. Агар Аллоҳни неъматларини санасангиз, саноғига ета олмайсизлар. Албатта, инсон ўта золим ва ўта ношукрдир”-деб марҳамат қилган. Биз Аллоҳ таолонинг неъматларига ношукрлик қилсак, неъматларнинг қадрига етмасак ва исрофгарчиликларга йўл қўйсак Аллоҳнинг қаҳрини келтирган бўламиз албатта.

Барчамизга маълум ва машҳурки, бугунги кунда дунёда “Коронавирус” эпидемияси дунёнинг глобал муаммоларидан бирига айланди. Бу борада барча ОАВда кўплаб муносабатлар билдирилмоқда. Энг муҳими бу оғир синовли кунларда давлатимиз раҳбари ҳам бизларнинг ғамимизни еб, ўз соғлиқларини кейинги ўринларга қўйиб, тинимсиз ҳаракат қилмоқдалар. Мисол тариқасида биз фуқароларни ўйлаб пандемияга қарши курашишда халқаро молия институтлари билан ҳамкорликни кучайтириш масалалари бўйича йиғилиш ўтказганини келтириш мумкин. Қолаверса, янги шифохона ва карантин ҳудудларини замонавий жиҳозлаш, ўпкани сунъий вентиляция қилувчи 2300 та аппарат ва бошқа ускуналар сотиб олиш бўйича топшириқлар берилди. Албатта, буларнинг барчаси биз фуқаролар манфаати учун қилинаётган ғамхўрликдир.

Бу борада яна айтиш мумкинки, ижтимоий соҳаларни қўллаб-қувватлаш, донор ташкилотлар билан қўшимча грант келишувлари имзолаш муҳимлиги қайд этилди. Республикамизнинг барча ҳудудларида эълон қилинган карантинда фақат биз фуқароларга биргина талаб қўйилган, у ҳам бўлса, “СOVID-19” пандемияси қоидаларига қатъий риоя қилиш, касалликка қарши кўрашаётганларга ёрдам беришдир. Хўш қандай ёрдам бериш мумкин? Албатта ўзимиз ва оила аъзоларимизни уйда сақлаб, ушбу касалликни тарқатувчиси бўлиб қолмаслигимиздир. Бу синовли кунларда биз Аллоҳ таолодан биз учун жонини аямасдан, кечаю-кундуз тинимсиз хизмат қилаётган юртбошимиз, у кишининг атрофидаги мутасадди ташкилотлар, айниқса тиббиёт ходимлари ҳақларига дуолар қилишимиз мақсадга мувофиқ ишлардан ҳисобланади.

Аллоҳ таоло юртимиздан ва бутун дунёдан бу балони тезроқ аришини  ҳамда бу синовдан эсон-омонликда ўтишимизни насиб қилсин!

Зилолахон Нурматова Ургут туман бош отинойиси