“Allohga va uning Rasuliga itoat qiling. O‘zaro nizo qilmang, u holda tushkunlikka uchraysiz va kuch quvvatingiz ketadi. Va sabr qiling. Albatta, Alloh sabr qiluvchilar bilandir”. (Anfol 46). Ushbu oyati karimada Alloh taolo mo‘min bandalarni ijtimoiy hayotning barcha jabhalarida nizoga bormaslikka chaqirmoqda.

Shunday ekan, musulmonlar masala tortishmasdan tinglashni, quloq tutishni va itoat qilishni yaxshi o‘rganib olishlari zarurdir. Abu Hurayra roziyallohu anhudan rivoyat qilinadi. Bir a'robiy Rasululloh sollallohu alayhi vasallam huzurlariga kelib: ”Ey Allohning rasuli! Meni bir amalga yo‘llab qo‘yingki, agar uni qilsam, jannatga kirayin”, dedi, Rasululloh sollallohu alayhi vasallam: “Allohga biror narsani sherik qilmasdan ibodat qilasan, farz namozlarini o‘qiysan, farz qilingan zakotni ado etasan va Ramazon oyi  ro‘zasini tutasan”, dedilar. Shunda u kishi: “Jonim Uning qo‘lida bo‘lgan Zotga qasamki, bu aytilgan narsalardan oshirib ham, kamaytirib ham yubormayman”, dedi. U kishi orqasiga qaytib ketganida, Rasululloh sollallohu alayhi vasallam: “Kimni jannat ahlidan bo‘lgan kishiga qarash xursand qilsa, mana bu kishiga nazar solsin”, dedilar. Imom Muslim rivoyati. Demak, musulmonlar buyurilgan narsalardan oshirib ham, kamaytirib ham yubormasdan, ba'zisini tutib, ba'zisini tark qilmasa, rahbarning ko‘rsatmasiga amal qilsa hech-bir nizo kelib chiqmas ekan. Bugun ijtimoiy tarmoqlarda musulmonlar bir-biri bilan tortishish, talashish bilan ovora. Biz musulmonlar xozirgi vaqtda Alloh taoloning “….va O‘zlaringizdan bo‘lgan boshliqqa itoat qiling”, deb marhamat qilgan oyatiga itoat qilishni go‘yo ututib qo‘yayotgandaymiz. Musulmonlarning rahbari aytgan so‘zlarni boshqa tomonga talqin qilish, yana bir fitnaning eshigini oshishdan boshqa narsa emas. Uning o‘rniga musulmonlarni sabr-toqatga va itoatga, go‘zal xulq va odobga chaqirib, masalaga ijobiy tomondan yondoshmoqlikni o‘rganishimiz va o‘rgatishimiz bugungi kunning ishidir. Musulmon ikkinchi musulmonning xatosini to‘g‘rilash o‘rniga unga yozishmali jang e'lon qilib, bir musulmonni battar adashishiga keng yo‘l ochib bermaylik. Axir dinimiz ta'limotida har qanday masalani ma'rifat bilan yechimini topishimiz ko‘rsatmasi berilgan-ku.  Har birimiz Alloh uchun masalaga ma'rifat bilan yondoshaylik! Aks holda, din dushmanlarining o‘ljasiga aylanib qolish hech gap emas. Ogoh bo‘ling ey musulmonlar!

Xayrulloh Sattarov

O‘MI Samarqand viloyati vakili o‘rinbosari