Умр оқар сувдек ўтиб боради.Турмуш ташвишлари билан бўлиб, баьзида яқин қариндошларимиз ҳолидан вақтида хабар олмаймиз. Қачонки бошимизга бир иш тушганда энг аввало ота-онамиз, ака – укаларимиз ёки яқинларимизни  эслаб қоламиз. Уларнинг далдас-ю, маслаҳатларига муҳтожлик сезамиз.

Динимизда қариндошлар ўртасида меҳр-оқибат, яқинларга яхшилик қилиш улуғланади, улар ўртасидаги борди-келдини узиш қаттиқ қораланади.

Аллоҳ таоло Қурьони каримда бундай марҳамат қилади: “Аллоҳга ибодат қилинглар  ва унга ҳеч нарсани шерик қилманглар! Ота – оналарга эса яхшилик қилинглар.Шунингдек қариндошлар, етимлар,мискинлар, қариндош қўшни-ю, бегона қўшни ёнингиздаги  ҳамроҳингиз   йўловчи (мусофир) га ва қўл остингиздаги (қарам) ларга ҳам яхшилик қилинг. Албатта Аллоҳ кибрли ва мақтончоқ кишиларни севмайди (Нисо, 36).

Ушбу ояти каримада яқинларга яхшилик қилиш Аллоҳ таолога ибодат қилиш ва У зотга ҳеч нарсани шерик қилмаслик билан бирга зикр қилинмоқда. Демак, оятда таькидлаб айтилганидек, ота-онага яхшилик қилиш, қариндош-уруғ билан борди-келди қилиш шариатнинг энг муҳим кўрсатмаларидан экан.

Расулуллоҳ соллаллоҳу алайҳи васаллам шундай деганлар: “Аллоҳга ширк келтирмасдан, ёлғиз ўзига ибодат қилиш, намозни қоим қилиш, закот бериш ва қариндош-уруғлик алоқаларини узмаслик бандани жаннатга яқин қилади, жаҳаннамдан узоқлаштиради” (Муттафақун алайҳ).

         Аллоҳ таоло бандаларига ниҳоятда меҳрибонлигидан  улар учун жаннатга кириш йўлларини кенгайтириб қўйди.  Ака – ука , опа – сингил, амма-хола, амаки-тоға ва уларнинг болалари билан яқин муносабат ўрнатиш, қариндош-уруғнинг  хурсандчилигига  шерик, мусибатига ҳамдард бўлиш, муҳтожга ёрдам бериш, бемордан  хабар  олиш  мўмин кишини жаннатга олиб боради.

         Муҳтожларга ёрдам қўлини чўзиш, аввало қариндошлар зиммасидаги шартлардан биридир. Кимки ана ўша шартлардан бирини унутса, бу қилимиши учун қиёматда жавоб беришига тўғри келади.

 Чунки ҳадиси шарифда:

Расулуллоҳ соллаллоҳу алайҳи васаллам дедилар: “Қариндошлик алоқаларини узувчи одам ҳаргиз жаннатга кирмайи”.

 Асадуллоҳ АЗЗАМОВ - Булунғур тумани “Эрганакли” жоме масжиди имом мхатиби