Жаннат макон юртимиз Ўзбекистон ҳар биримиз учун муқаддасдир. Шу юртда туғилдик, униб ўсдик, мусаффо осмон остида тинч-тотув яшамоқдамиз. Яратган зот Аллоҳ таоло неъматларини мўл-кўл қилиб бериб турибди. Ҳар бир неъматни қадрига етиб, уни исроф қилмасдан фойдалансак Аллоҳ неъматларини янада зиёда қилади. Қурони каримнинг “Наҳл” сураси, 114-оятида:

فَكُلُواْ مِمَّا رَزَقَكُمُ اللّهُ حَلالاً طَيِّباً وَاشْكُرُواْ نِعْمَتَ اللّهِ إِن كُنتُمْ إِيَّاهُ تَعْبُدُونَ

“Бас, Аллоҳ сизга ризқ қилиб берган нарсалардан ҳало, пок ҳолида енг. Ва агар унга ибодад қиладиган бўлсангиз, Аллоҳнинг неъматига шукр қилинг” дейилган.

Нуроний ота-оналаримиз ҳар дамда дуоларида юртимизга тинчлик, осойишталик, ризқимизга барака сўраб дуо қилиб турибдилар. “Иброҳим” сураси 34-оятида Аллоҳ таоло марҳамат қилиб “Ва У сизга барча сўраган нарсаларингиздан берди. Агар Аллоҳнинг неъматларини санасангиз, саноғига ета олмассизлар. Албатта, инсон ўта золим ва ўта ношукрдир” деган.

Ҳозирги кунда далаларимизда оппоқ бўлиб очилиб турган пахта ҳам бизга Аллоҳнинг берган чексиз неъматларидандир. Бу неъматни нес-нобуд қилмасдан йиғиб олиш ҳар биримизнинг бурчимиз. Юртимиз бойлиги, ризқ рўзимиз бўлган пахтани исроф қилмасдан териб олсак, шунда шукур қилган ва неъматни қадрига етган бандалардан бўламиз. Раббимиз Аллоҳ яна ризқимизни зиёда қилади. Ваҳоланки, Аллоҳ Ўз каломида “Қасамки, агар шукр қилсангиз, албатта, сизга зиёда қилурман. Агар куфр келтирсангиз, албатта, азобим шиддатлидир” (Иброҳим сураси, 7-оят), деб эслатган.

Сайдулло РЎЗИЕВ – Каттақўрғон шаҳар “Қориравот” жоме масжиди имом-хатиби